Dagur 4 – Sunnudagur 28. febrúar

Meðfram Atlantshafinu, stórbrotin náttúra og portúgölsk vín.

Í dag ætlum við að kynnast stórbrotinni strandlengju Sintra, þar sem Atlantshafið hefur í aldanna rás mótað háa kletta, fallegar víkur og litlar sandstrendur. Hér er náttúran allt önnur en í gróskumiklum skógunum sem við gengum um á fyrsta göngudeginum.

Við leggjum af stað í fallega strandgöngu með staðar leiðsögumanni og njótum ferska sjávarloftsins og útsýnisins yfir hafið. Á leiðinni kynnumst við sögu og náttúru svæðisins og gefum okkur góðan tíma til að njóta þess sem fyrir augu ber. Gönguleiðin hefur verið sérstaklega aðlöguð að hópnum þannig að við getum notið þessarar fögru strandlengju án þess að þurfa að takast á við bröttustu og erfiðustu kaflana.

Að göngunni lokinni setjumst við niður á notalegum veitingastað og njótum góðs hádegisverðar.

​

Síðdegis bíður okkar síðan önnur skemmtileg upplifun þegar við heimsækjum víngerð á svæðinu. Vínræktin hér á sér langa og merkilega sögu og nálægðin við Atlantshafið hefur mikil áhrif á ræktunina og karakter vínanna. Við fáum að fræðast um þessa sérstæðu vínhefð og að sjálfsögðu að smakka á vínum svæðisins.

Þetta verður yndislegur dagur þar sem við sameinum hreyfingu í fallegri náttúru, góðan mat og áhugaverða innsýn í portúgalska vínmenningu.

Göngutími: um 2½ klukkustund.

Dagur 5 – Mánudagur 1. mars

Cascais, konungleg saga, portúgalskar kræsingar og notalegt bæjarlíf.

Í dag ætlum við að njóta Cascais, þessa heillandi strandbæjar sem eitt sinn var lítið fiskimannaþorp en varð á 19. öld vinsæll sumardvalarstaður portúgölsku konungsfjölskyldunnar. Hér mætast gömul fiskimannahefð, glæsilegar byggingar, fallegar strendur og notalegt bæjarlíf við Atlantshafið.

Við gefum okkur góðan tíma til að rölta um gamla bæinn á eigin hraða, skoða þröngar steinlagðar götur, litlar verslanir og falleg torg eða setjast á kaffihús og fylgjast með mannlífinu. Hér er yndislegt að njóta þess að vera í fríi, án þess að þurfa að flýta sér nokkuð.

Um hádegisbilið stefnum við á að koma saman yfir góðum portúgölskum hádegisverði. Þar fáum við tækifæri til að njóta staðbundinna kræsingar í góðum félagsskap.

Síðdegis verður frjáls tími til að njóta bæjarins. Þeir sem vilja geta gengið meðfram sjónum að Boca do Inferno, stórbrotinni klettamyndun þar sem Atlantshafsöldurnar hafa í aldanna rás sorfið sig inn í klettana. Aðrir geta haldið áfram að skoða bæinn, notið kaffihúsamenningarinnar, skoðað í verslanir eða farið aftur á hótelið og slakað á.

Þetta verður notalegur dagur þar sem við leyfum okkur einfaldlega að njóta lífsins í þessum fallega bæ Cascais.

Dagur 6 – Þriðjudagur 2. mars

Lissabon, litrík hverfi, portúgalskar kræsingar og heillandi borgarlíf.

Í dag ætlum við að njóta þess sem Lissabon hefur upp á að bjóða! Þessi heillandi höfuðborg er full af lífi og litum, með þröngum steinlögðum götum, fallegum húsum skreyttum litríkum flísum, gömlum sporvögnum og notalegum torgum þar sem mannlífið blómstrar. Hér er alltaf eitthvað spennandi handan við næsta horn.

Við ætlum að skoða borgina á skemmtilegan og svolítið óvenjulegan hátt, á litlum tuk-tuk bílum! Íslenskur leiðsögumaður tekur á móti okkur og næstu þrjár klukkustundirnar brunum við um hæðir og hlykkjóttar götur Lissabon, skoðum gömlu borgarhverfin og stoppum á fallegum stöðum til að njóta útsýnisins. Við gefum okkur líka góðan tíma til að rölta um, fylgjast með mannlífinu og jafnvel setjast niður og fá okkur eitthvað gott í glas.

Og auðvitað ætlum við að leyfa bragðlaukunum að njóta sín! Á leiðinni stoppum við til að smakka ýmsar portúgalskar kræsingar og kynnast matarmenningu landsins.

Ferðinni lýkur á góðum stað þar sem hægt verður að fá sér hádegisverð. Eftir það tekur við frjáls tími til að njóta borgarinnar á eigin vegum. Kannski freistar þess að rölta um verslunargöturnar, finna lítið kaffihús í sólinni eða einfaldlega setjast niður og fylgjast með lífinu í þessari heillandi borg.

Seinni part dags höldum við aftur til Cascais, vonandi með bros á vör og fullt af skemmtilegum minningum frá Lissabon.

Dagur 7 – Miðvikudagur 3. mars

Meira af töfrandi umhverfi Sintra, skógar, leyndir garðar og ævintýraleg höll.

Í dag bíður okkar síðasta gönguferðin og hún verður sannarlega ekki af verri endanum! Við höldum aftur inn í gróskumikinn Sintra fjallgarðinn þar sem dularfullir skógar, fallegir garðar og sögulegar byggingar skapa nær ævintýralega umgjörð. Gönguleiðin nefnist "The Unexpected Gardens" og á leiðinni kynnumst við tveimur afar ólíkum stöðum sem eiga það sameiginlegt að vera einstaklega heillandi.

Fyrst heimsækjum við Convento dos Capuchos, lítið klaustur frá 16. öld sem er nánast falið inni í skóginum. Hér lifðu munkar við ótrúlega einfaldar aðstæður, í litlum vistarverum þar sem korkur var meðal annars notaður til einangrunar. Klaustrið og náttúran í kring mynda einstaka heild þar sem gróður, mosavaxnir steinar og gömul tré skapa kyrrlátt og næstum dularfullt andrúmsloft.

Síðan liggur leiðin áfram um fallega skógarstíga að Monserrate, einum stórkostlegasta garði Portúgals og sannkallaðri perlu rómantísku stefnunnar. Garðurinn er talinn eitt fegursta dæmi Evrópu um landslagsgarð frá Viktoríutímanum og hér hefur verið skapaður ævintýralegur heimur með framandi trjám og plöntum frá öllum heimshornum, litlum lækjum, fossum og gróðursælum göngustígum. Hvert sem litið er blasir eitthvað nýtt við og það er auðvelt að gleyma sér í þessari grænu paradís.

Í miðjum garðinum stendur hin undurfagra Palácio de Monserrate, höll sem sameinar ólíka byggingarstíla á einstaklega heillandi hátt. Rómantískt yfirbragð staðarins heillaði meðal annars enska skáldið Lord Byron, sem gerði Monserrate ódauðlegt í skrifum sínum. Hér er eins og við stígum inn í annan heim, þar sem náttúra, list og byggingarlist renna saman í eina stórkostlega heild.

Við gefum okkur góðan tíma til að njóta garðanna og ætlum að taka með okkur gott nesti sem við borðum í þessu fallega umhverfi, ef veður leyfir. Ef veðrið verður ekki með okkur í liði setjumst við þess í stað niður yfir notalegum hádegisverði á veitingastað í garðinum.

Þetta verður yndislegur lokadagur í náttúru Sintra, þar sem við njótum einstakrar fegurðar, áhugaverðrar sögu og góðrar samveru.

Gönguvegalengd: um 10 km.

Gisting:

Longevity Senses Cascais ★★★★★

Lúxus, kyrrð og vellíðan við Atlantshafið.

Það er ekki á hverjum degi sem maður fær að dvelja á hóteli þar sem allt virðist hannað til að láta manni líða vel. Í þessari ferð ætlum við að gera sérstaklega vel við okkur og gista allar sjö næturnar á hinu glæsilega fimm stjörnu Longevity Senses Cascais Boutique Hotel & Clinic, sannkölluðum sælureit við Atlantshafið.

Hótelið stendur á fallegum stað milli Cascais og Guincho, umkringt gróðursælum görðum og með stórkostlegt útsýni yfir hafið. Þetta er lítið og einstaklega vandað lúxushótel, eingöngu ætlað fullorðnum gestum, þar sem rólegt andrúmsloft, persónuleg þjónusta og glæsileg hönnun skapa notalega umgjörð um dvölina.

Herbergin eru fallega innréttuð með þægindi og vellíðan í fyrirrúmi. Hótelið er aðeins með 39 herbergi og svítur og því er stemningin mun persónulegri en á stórum hótelum.

Eftir dag í fallegri náttúru Sintra eða á ferð um portúgölsku strandlengjuna er yndislegt að koma aftur á hótelið og njóta þess sem það hefur upp á að bjóða. Hér er glæsileg heilsulind með upphitaðri innisundlaug, gufubaði, tyrknesku baði og ýmiss konar slökunaraðstöðu. Einnig er útisundlaug með saltvatni, heitur pottur og vel búin líkamsræktaraðstaða. Þeir sem vilja dekra enn meira við sig geta bókað nudd eða aðrar vellíðunarmeðferðir.

Á veitingastað hótelsins, Sea Senses, er lögð áhersla á ferskt hráefni, portúgalska matargerð og bragðgóða Miðjarðarhafsrétti, allt í fallegu umhverfi með útsýni yfir Atlantshafið.

Longevity Senses er miklu meira en bara staður til að gista. Hér gefst okkur tækifæri til að njóta kyrrðarinnar, hlúa að okkur sjálfum og hlaða batteríin á milli ævintýralegra daga.

Það er erfitt að hugsa sér fallegri stað til að kalla heimili okkar þessa viku í Portúgal.

VERÐ og skilmálar​

VERÐ KR 486.900-  Á MANN MIÐAÐ VIÐ TVO Í HERBERGI.

​Aukalega KR 62.700,-  MIÐAÐ VIÐ EINN Í HERBERGI.​