Um okkur
Ferðalög sem næra líkama, sál og starfsanda
Heillandi Heimur er ferðaskrifstofa sem leggur áherslu á vandaðar ferðir, persónulega þjónustu og eftirminnilega upplifun. Við trúum því að góð ferð sé meira en heimsókn á nýjan áfangastað – hún sé tækifæri til að njóta lífsins, kynnast nýrri menningu, efla tengsl og koma heim ríkari af reynslu.
Við sérhæfum okkur í fámennum hópferðum þar sem hreyfing, náttúra, menning og góður félagsskapur fara saman. Ferðirnar höfða sérstaklega til virks fólks á besta aldri sem vill upplifa heiminn á fjölbreyttan hátt, njóta hæfilegrar hreyfingar og ferðast í góðum félagsskap. Við leggjum áherslu á vel skipulagða dagskrá, vandaða gistingu og góða umsjón fararstjóra.
Jafnframt bjóðum við fyrirtækjum, félagasamtökum og öðrum hópum sérhæfða þjónustu við skipulagningu funda, ráðstefna, hvataferða, árshátíða og annarra hópferða. Að baki þeirri þjónustu liggur áratuga reynsla af alþjóðlegri ferðaþjónustu, hótel- og ráðstefnumiðlun og víðtækt tengslanet um allan heim.
Það sem sameinar alla okkar starfsemi er metnaður fyrir persónulegri þjónustu, vandaðri skipulagningu og ferðalögum sem gefa meira en þau taka.
Teymið
Rósa Halldórsdóttir
samstarfsaðili
Ferðaskipulagning og fararstjórn.
Rósa starfar með Heillandi Heimi við skipulagningu ferða og sem fararstjóri í ferðum okkar. Hún hefur mikinn áhuga á ferðalögum, náttúru og útivist og er sjálf ákafur göngugarpur sem nýtir hvert tækifæri til að ganga á fjöll og njóta íslenskrar náttúru.
Rósa býr yfir fjölbreyttri menntun sem nýtist vel í ferðum okkar. Hún er menntaður leiðsögumaður, sjúkraliði, jógakennari og skyndihjálparkennari, auk þess að vera höfuðbeina- og spjaldhryggjar meðferðaraðili.
Þekking hennar á heilsu, hreyfingu og skyndihjálp, ásamt einlægum áhuga á útivist, er dýrmæt við skipulagningu og fararstjórn. Hún leggur sitt af mörkum til að skapa öruggt og notalegt umhverfi þar sem þátttakendur geta notið hreyfingar, náttúru og góðs félagsskapar.
Harpa Einarsdóttir
eigandi
Harpa er stofnandi Heillandi Heims.
Hún hefur starfað við ferðaþjónustu frá árinu 1989 og býr yfir víðtækri reynslu af hótelrekstri, alþjóðlegri hótel- og ráðstefnumiðlun og skipulagningu ferða og viðburða. Hún er með meistaragráðu í alþjóðlegri markaðsfræði og stjórnun frá Copenhagen Business School.
Starfsferill hennar hófst sem fjármálastjóri á hóteli í Reykjavík. Síðar starfaði hún meðal annars sem hótelstjóri og sölu- og markaðsstjóri hjá alþjóðlegri hótelkeðju. Frá árinu 2002 hefur hún starfað í samstarfi við stærsta alþjóðlega fyrirtæki heims á sviði hótel- og ráðstefnumiðlunar (venue finding). Í gegnum það samstarf hefur hún aðstoðað fjölmörg íslensk fyrirtæki og félagasamtök við að finna hótel og ráðstefnustaði og skipuleggja fundi, ráðstefnur og viðburði víðs vegar um heiminn.
Harpa hefur komið að skipulagningu og fararstjórn ferða í nánast öllum heimsálfum og hefur sérstaka ánægju af því að skapa ferðalög þar sem náttúra, menning, hreyfing og góður félagsskapur fara saman.
Áhugi hennar á heilsu og vellíðan hefur einnig leitt hana til náms í heilsumarkþjálfun við Institute for Integrative Nutrition og sem Yoga Nidra leiðbeinanda við Amrit Yoga Institute.
Með Heillandi Heimi sameinar Harpa áratuga reynslu af alþjóðlegri ferðaþjónustu, persónulega þjónustu og áhuga sinn á ferðalögum sem næra líkama og sál.
