Ljubljana, Bohinj dalurinn og Bled 

 Göngur - hjól - matur - saga - slökun - stórbrotin náttúra

 

Ferðin hefst og henni lýkur í Ljubljana sem er ein fámennasta höfuðborg Evrópu með um 293.000 íbúa. Borgin er mjög aðlaðandi með kastala, fallegum gömlum byggingum, þröngum strætum og sögulegum stöðum sem verða skoðaðir í hjóla- og matarferð. Ljubljana er vinaleg borg með afslappaðan anda og græna sál, en hún er einnig menningarmiðstöð Slóveníu með háskólasetri, leikhúsum, óperu og fleira. Það má því með sanni segja að borgin hafi uppá margt að bjóða.  

 

Farið verður í einn af elstu þjóðgörðum Evrópu, Triglav þjóðgarðinn, mismunandi svæði hans verða skoðuð í göngu- og hjólaferðum. Gist verður á frábærum hótelum með sundlaugum og heilsulind, annars vegar í paradísardalnum Bohinj sem er umvafinn Júlísku Ölpunum og hins vegar í náttúruperlunni Bled í jaðri Triglav þjóðgarðsins. Á Triglav svæðinu má finna gríðarlega náttúrufegurð með víðáttumiklum skógum, beitilöndum, djúpum dölum og kristaltæru vatni sem rennur niður úr hlíðum fjalla í ár, vötn og læki. Í hjarta þjóðgarðsins við rætur óspilltra fjalla og fjallatinda er stærsta vatn Slóveníu, Bohinj-vatnið. Þjóðgarðurinn er ekki aðeins frægur fyrir fallega náttúru heldur einnig fyrir ríka arfleifð goðsagna og þjóðsagna. Á þessu svæði lifir fólk í sátt og samlyndi við náttúruna.  

 

Dagskrá

Gert er ráð fyrir að þátttakendur komi sér sjálfir til Ljubljana en dagskránin hefst þar 1. október. Við aðstoðum að sjálfsögðu við að bóka flug ef óskað er eftir. Gist verður í höfuðborginni fyrstu tvær næturnar og borgin skoðuð á hjólum. Á degi 3 verður ekið af stað til Bohinj dalsins þar sem gist verður í 3 nætur. Á þessum dögum verður gengið um svæðið umhverfis Bohinj vatnið  og hin dásamlega náttúra Triglav þjóðgarðsins skoðuð í göngu- og hjólaferðum.  

​

Frá Bohinj dalnum verður farið til Bled sem er ímynd paradísar og hefur svæðið verið tilnefnt til "Seven wonders of the world".  Farið verður um svæðið á hjólum um fallega slóða sem aðeins heimamenn þekkja og þátttakendur geta notið þess helsta sem Bled bíður upp á. Það er sannkallað ævintýri að dást að vatninu í Bled, litlu eyjunni og tilkomumikla kastalanum.

​

Ferðin endar á upphafsstað, í Ljubljana og síðustu nóttina er gist í höfuðborginni. Mögulegt er að lengja ferðina bæði í byrjun og lok ferðar.

​

Ýtarlegri dagskrá og nánari upplýsingar má finna í ferðaáætlun.

​

Gisting 

Hótel Slon**** er staðsett í hjarta Ljubljana, í 5mín göngufæri frá kastalanum og Tívolíinu. 

 

The Bohinj Eco Hotel*** er vistvænt hótel staðsett í Júlísku Ölpunum. Það hefur gott orðspor fyrir framúrskarandi matargerð og fjölbreytt framboð afþreyingar. Sundlaug og heilsulind er við hótelið.

 

Hótel Rikli Balance**** fléttar saman hefðir staðarins við bætta heilsu og vellíðan gesta. Sundlaug og heilsulind er við hótelið.