​Kent er gjarnan kallað „garður Englands“ og ekki að ástæðulausu. Hér mætast grænar sveitir, hvítir kalkklettar, falleg strandþorp, sögulegar borgir og aldagömul menningararfleifð sem hefur mótað sögu Englands í árhundruð. 

​Í þessari notalegu göngu- og menningarferð upplifum við það besta sem Kent hefur upp á að bjóða. Við göngum eftir strandstígum með útsýni yfir Ermarsundið, heimsækjum kastala og dómkirkju, röltum um heillandi sjávarþorp, smökkum vín og bjór frá staðbundnum framleiðendum og njótum þess að ferðast á rólegum hraða þar sem tími gefst til að upplifa og njóta. 

​Við fylgjum hinum frægu hvítu klettum Dover, heimsækjum hinn sögufræga Dover-kastala, göngum um miðaldaborgina Canterbury og kynnumst sjávarstemningunni í Whitstable, sem er þekkt um allt England fyrir ostrur sínar og líflega hafnarmenningu. 

​Á leiðinni gefst þeim sem vilja einstakt tækifæri til að stinga tánni í Ermarsundið – eða jafnvel taka sundsprett í einu frægasta sundi heims.  Við munum svo heimsækja hina sögufrægu White Horse krá, þar sem þeir sem synt hafa Ermarsundið hafa skráð nafn sitt og dagsetningu á sundinu á veggi kráarinnar.

​Þetta er ferð fyrir þá sem vilja sameina fallegar göngur, menningu, sögu, góðan mat og einstaka stemningu ensku sveitanna. ​​

Dagskrá ferðarinnar:

 

Dagur 1 – Föstudagur 28. ágúst 

​

Flug með Icelandair frá Keflavík til London Gatwick. 10:30 - 14:40

​

Við komuna til Englands tekur rúta á móti hópnum og ekið er til strandbæjarins Dover við suðausturströnd landsins. 

 

Eftir innritun á hótelið gefst tími til að slaka á eða kanna nærumhverfið áður en við hittumst öll saman í sameiginlegum kvöldverði og setjum tóninn fyrir komandi daga. 

​​

​​​​

Dagur 2 – Laugardagur 29. ágúst 

​

Hvítu klettarnir í Dover og Walmer-kastali .

​

Við byrjum ferðina á einni fegurstu gönguleið Suður-Englands.  Gengið er frá Dover að St. Margaret's Bay eftir stígum sem liggja uppi á hinum heimsfrægu hvítu kalkklettum Dover. Útsýnið yfir Ermarsundið er stórkostlegt og á björtum degi má sjá strendur Frakklands handan hafsins. 

​

Við njótum hádegisverðar á hinum notalega Smugglers Bar áður en haldið er áfram til Walmer.  Göngunni lýkur við Walmer-kastala, sem var reistur af Henry VIII á árunum 1539–1540 til að verja suðurströnd Englands. Í dag er kastalinn fallegt sveitasetur með glæsilegum görðum sem gaman er að skoða.  Við fáum okkur hressingu í testofunni og tökum svo strætó til baka. Komum á hótelið seinni part dags.  

​

Eftir að við komum til baka á hótelið gefst þeim sem vilja einstakt tækifæri til að skella sér til sunds í Ermarsundinu. Fyrir marga verður það sérstök upplifun að synda í sama sundi og þúsundir sundgarpa hafa lagt undir sig í gegnum tíðina. 

​

Að sundinu loknu höldum við á hina sögufrægu strandkrá The White Horse, þar sem við fáum okkur hressingu og njótum stemningarinnar. Kráin hefur lengi verið vinsæll viðkomustaður þeirra sem tengjast þessu fræga sundi og á veggjum hennar má finna nöfn og dagsetningar þeirra sem hafa synt yfir Ermarsundið.

Gönguvegalengd: um 13 km.