Dagar í paradís á Paros | 16.–23. október

Á meðan á dvöl okkar stendur á Paros gistum við á hinu einstaka Okreblue Seaside Yoga Retreat Center við Filizi-ströndina. Þar njótum við rólegs umhverfis, hlýrrar haustsólar, sjávarloftsins og þess afslappaða lífsstíls sem grísku eyjarnar eru svo þekktar fyrir.  Dagarnir á Paros eru fjölbreytt blanda af hreyfingu, náttúruupplifun, menningu og afslöppun

Alla morgna byrjum við daginn með nærandi ferskur smoothie og jógatíma sem vekur líkamann, róar hugann og undirbýr okkur fyrir daginn. Að loknu jóga fáum við okkur dýrindis bröns áður en við höldum út til að njóta þess sem eyjan hefur upp á að bjóða.

 

Við förum í fallegar gönguferðir um ólíka hluta eyjarinnar, þar sem við fylgjum fornum Býsönskum stígum sem liggja í gegnum hefðbundin þorp, ilmandi ólífulundi og fallegt sveitalandslag. Á leiðinni fáum við innsýn í sögu, menningu og daglegt líf eyjarskeggja á sama tíma og við njótum stórbrotins útsýnis yfir Eyjahafið.

Við könnum einnig hina hrífandi strandlengju Paros Park þar sem klettóttir stígar, afskekktar víkur og ótrúlegt útsýni gera gönguna að einstakri upplifun. Þar gefst jafnframt tækifæri til að kæla sig í kristaltærum sjónum og njóta kyrrðarinnar sem einkennir þetta fallega svæði.

Ævintýrin halda áfram á sjónum þar sem við förum í kajakferð meðfram ströndinni, stoppum í fallegum víkum til að synda og snorkla og njótum þess að upplifa eyjuna frá allt öðru sjónarhorni. Einnig förum við í siglingu um Eyjahafið þar sem við slökum á um borð, njótum sólarinnar, hafgolunnar og þess frelsis sem fylgir því að vera úti á opnu hafi.

Við gefum okkur einnig tíma til að upplifa gríska eyjalífið af eigin raun með heimsókn til hins heillandi bæjar Naousa. Þar röltum við um hvítkölkuð hús, þröngar steinlagðar götur og litlar handverks- og hönnunarverslanir. Við njótum stemningarinnar við gömlu fiskihöfnina, fylgjumst með daglegu lífi heimamanna og upplifum þá einstöku blöndu af afslöppuðu eyjalífi og grískum sjarma sem gerir Naousa að einum fallegasta bæ Kýkladeyjanna.

 

Allt þetta gerum við á rólegum og notalegum hraða þar sem markmiðið er ekki aðeins að sjá og upplifa sem mest, heldur einnig að gefa okkur tíma til að njóta augnabliksins, tengjast náttúrunni og fylla á orkuna.

​

Á kvöldin hægjum við á taktin­um með mjúku jóga, djúpslökun, hugleiðslu eða hljóðheilun áður en dagurinn endar í kyrrð og vellíðan.

​

Næring fyrir líkama og sál

Maturinn á Okreblue er hluti af upplifuninni sjálfri. Þar er lögð áhersla á hollan, næringarríkan og einstaklega bragðgóðan mat sem byggir á ayurvedískri hugmyndafræði um jafnvægi, vellíðan og góða meltingu.

Í boði er fjölbreytt úrval jurtafæðis þar sem framandi krydd og bragðheimur Indlands mætir ferskleika og einfaldleika grískrar matargerðar. Hver og einn setur saman sinn eigin disk úr fjölbreyttu úrvali rétta sem eru bæði nærandi og fallega fram bornir.

Við njótum máltíðanna saman á útiverönd Caretta veitingastaðarins með stórkostlegu útsýni yfir Eyjahafið. Bröns og kvöldverður eru skipulagðir í takt við daglega jógaiðkun og hannaðir til að styðja við orku, jafnvægi og góða líðan. Á milli mála er einnig hægt að fá ferska safa, smoothie, hollt snarl og salöt fyrir þá sem vilja gera sér dagamun.

Þetta eru dagar þar sem hreyfing, náttúra, næring, slökun og góð samvera fléttast saman í eina heild – fullkomið tækifæri til að fylla á orkuna og lengja sumarið undir grískri haustsól.